అనర్హులకు అందిన ఇందిరమ్మ ఇండ్లు… అర్హుల ఆవేదన | Deserving people are expressing their grief that Indiramma gave houses those who are not eligible

తెలంగాణ రాష్ట్ర ప్రభుత్వం ఈ పథకాన్ని పకడ్బందీగా అమలు చేయడానికి ఒక కార్యాచరణ ప్రణాళికను రూపొందించింది. ప్రతి నియోజకవర్గానికి ప్రత్యేక అధికారులు, మండలాలకు గెజిటెడ్ అధికారులను నియమించింది. ఇప్పటికే రాష్ట్రవ్యాప్తంగా ఉన్నటువంటి పలు ప్రాంతాల్లో ఇందిరమ్మ కమిటీల ద్వారా లబ్ధిదారులను ఎంపిక చేశారు. ఈ పథకం ద్వారా ఇండ్లు పొందిన లబ్ధిదారుల జాబితాను కూడా ప్రభుత్వం విడుదల చేసింది.

రాష్ట్రవ్యాప్తంగా పలు ప్రాంతాల్లోని లబ్ధిదారులకు ఇండ్ల నిర్మాణం మంజూరు పత్రాలను సైతం అందజేశారు. పలు ప్రాంతాల్లో ఇండ్ల నిర్మాణ పనులు ప్రారంభమయ్యాయి. హనుమకొండ జిల్లా రెండవ డివిజన్ గుండ్ల సింగారం ప్రాంతంలోని పలువురు ఇందిరమ్మ ఇండ్ల బాధితులు తమకు ఇండ్లు రాలేదని ఆవేదన చెందుతున్నారు. అర్హులకు కాకుండా అనర్హులకు ఇండ్లు కేటాయించారంటూ బాధితులు వాపోతున్నారు.

మొదటి విడత లిస్టులో తమ పేరు వచ్చినా ఇంతవరకు తమకు మంజూరు పత్రాన్ని అందించలేదన్నారు. ఇదే విషయాన్ని స్థానిక నాయకులను, అధికారులను అడిగితే రెండో విడతలో మళ్లీ పెడదామంటూ కాలయాపన చేస్తున్నారని వాపోయారు. గత 15 సంవత్సరాలుగా ఇదే ప్రాంతంలో ఉంటున్నామని మొదట్లో తమ పేరు వచ్చినా ఇంతవరకు తమకు ఇండ్లు కేటాయించలేదన్నారు.

కష్టపడి కూలి పని చేసుకుంటూ ఎన్నో ఏండ్లుగా ఇదే ప్రాంతంలో జీవిస్తున్నామని, అధికారులు వచ్చి సర్వే చేపట్టి సొంత జాగా ఉందని తెలుసుకున్నాకే మొదటి లిస్టులో పేరు ప్రవేశపెట్టారని, అయినా తమకు ఇండ్లు ఎందుకు కేటాయించడం లేదని, ఇప్పటికైనా అధికారులు స్పందించి మాకు ఇండ్లు కేటాయించాలని కోరుతున్నారు. ఈ ప్రాంతంలో అర్హులకు కాకుండా సొంతిల్లు ఉన్నవారికే ఇండ్లు వచ్చాయని, అధికారులకు ఇది కనిపించడం లేదా అని ప్రశ్నిస్తున్నారు. ఇప్పటికైనా అధికారులు ఈ ప్రాంతంలో రీసర్వే చేపట్టాలని, అసలైన లబ్ధిదారులను గుర్తించి ఇండ్లు కేటాయించాలని ప్రభుత్వానికి విజ్ఞప్తి చేశారు.