కాకినాడ ఇండోర్ స్టేడియం మెయింటెనెన్స్ సమస్యలు.. క్రీడాకారుల ఇబ్బందులు..! Kakinada Indoor Stadium Maintenance Issues Athletes Face Problems

కాకినాడ జిల్లాకు సంబంధించి ఇండోర్ స్టేడియం అథారిటీ అధికారుల ఆధ్వర్యంలో.. అనేక స్టేడియాలు ఉన్నాయి. దీనిలో జిల్లాలో మొట్టమొదటిది కాకినాడ కేంద్రం అయితే రెండవది రూరల్ తుని ప్రాంత రాజా మైదానం ఇండోర్ స్టేడియం. ఈ స్టేడియంలో షటిల్ కోర్టు పూర్తిగా ఇండోర్‌లో ఉంటుంది. ఇక్కడ గంటల చొప్పున స్లాట్స్ ను క్రీడాకారులు బుక్ చేసుకుంటారు. అయితే షటిల్ ఆడే కింద భాగం అంతా పూర్తిగా వుడ్‌వర్క్ తో చేయించిన పరిస్థితి ఉంది. అయితే ఆ వుడ్ అంత పూర్తిగా చిన్నాభిన్నం.. వాటి మరమ్మతులు గత ఏడాది కాలంగా చేయించని పరిస్థితి. ఇలాంటి తరుణంలో కొంతమంది క్రీడాకారులు గాయపడుతున్నారు.

ఇదిలా ఉండగా మైదానానికి సంబంధించి రెండు సెప్టిక్ ట్యాంకులు గత కొన్నాళ్లుగా మూతలు లేకుండా ఉండటంతో మూగజీవులు.. గ్రౌండ్ కి వచ్చిన క్రీడాకారులు ఇబ్బందులు పడుతున్నారు. క్రీడాకారులు వాటిలో పడిన సందర్భాలు కూడా ఉన్నాయి. ఈ విషయాన్ని అక్కడ మెయింటెనెన్స్ అధికారులకు చెప్పినప్పటికీ.. ఎవరూ పట్టించుకోని పరిస్థితి ఉందని వాకర్స్ అంటున్నారు. మరీ ముఖ్యంగా కనీసం మైదానంలో క్రీడాకారులు తప్ప, క్రీడా మైదానం మెయింటెనెన్స్ అధికారులు మాత్రం కనీసం శుభ్రం కూడా చేయించకపోవటంతో పాములు బెడద ఉందని ఆరోపిస్తున్నారు.

ఈ రాజా మైదానానికి సంబంధించి రెండు ఎంట్రన్స్ లు ఉన్నాయి.. అయితే ప్రధాన రహదారి నుంచి వచ్చే ఎంట్రన్స్ గేట్ పగటిపూట కూడా వూసివేసి ఉంటుంది. ఆ గేటు కూడా పూర్తిగా శిథిలావస్థకు చేరడం.. తుప్పు పట్టడంతో రాకపోకలకు తీవ్ర ఇబ్బందులు పడుతున్నట్లు వాకర్స్ చెబుతున్నారు. ముఖ్యంగా అసలు గేటు ఎందుకు క్లోజ్ చేస్తున్నారని.. ప్రవ్నిస్తున్నారు. రాత్రి సమయంలో మందుబాబులు అలజడి సృష్టిస్తారన్న భయం ఉంటే.. చీకటి పడిన తర్వాత గేట్ లాక్ చేయాలి కానీ.. ఉదయం ఇలా ఎందుకు చేస్తున్నారని ప్రశ్నిస్తున్నారు. ప్రధాన గేట్ లాక్ చేయడం వలన సందులోంచి వంగి వంగి రాలేక తీవ్ర ఇబ్బందులు పడుతున్నామని అంటున్నారు. ఇప్పటికైనా సంబంధిత అధికారులు స్పందించి ఈ సమస్యలను పరిష్కరించాలని వారు కోరుతున్నారు.