కాకినాడ-సామర్లకోట రహదారిలో శ్రీ ముత్యాలమ్మ తల్లి ఆధ్యాత్మిక ప్రదేశం. Sri Mutyalamma Talli Devotees Faith Despite No Temple

వందల ఏళ్ల కిందట ఆ చెట్టులోనే స్వయంభువుగా వెలసిన అమ్మవారు.. శ్రీ ముత్యాలమ్మ తల్లి. చుట్టుపక్కల ప్రజలు ఈ అమ్మవారిని సువాసన భరితమైన తల్లి అంటూ పిలుస్తారు. ఎందుకంటే ఆ ప్రాంగణంలో అడుగుపెడతూనే ఓ ఆధ్యాత్మిక సువాసన మనసును తాకుతుంది. మనస్సుకు ఓ శాంతిని పంచుతుంది. అమ్మవారు కనిపించేది చెట్టులోనే. విగ్రహం లేదు. ఆలయం లేదు. అయినా ఆ చెట్టే ఆలయంగా మారిపోయింది. ఆ చెట్టే శాంతి స్థూపంగా నిలిచిపోయింది.

ఆ ప్రాంతాన్ని చూసిన వారంతా ఒక్క మాటే చెబుతారు.. ఇక్కడ అడుగు పెట్టగానే ఎలాంటి ఉద్విగ్నత అయినా తగ్గిపోతుందని.. మండుటెండలోనూ అక్కడ ఉన్న చెట్టు తన చల్లని నీడను చల్లగా కమ్మేస్తుంది. పక్కనే పారే చిన్న సెలయేరు, చెట్టు చల్లని గాలి, అక్కడి మౌనం అన్నీ కలసి ఒక అద్భుతమైన ఆధ్యాత్మిక ప్రదేశంగా.. కనిపిస్తాయి. చిన్న పిల్లలు సైకిల్‌పై వెళ్లినా, ఆటోలు, కార్లు, బస్సులు ఏ వాహనమైనా ఈ ప్రాంగణంలో ఆగి అమ్మవారిని దర్శించుకుంటాయి. ఎందుకంటే, ఆమె ఆశీస్సులు ఉంటే ప్రయాణం సురక్షితంగా సాగుతుందని ప్రజల నమ్మకం. ఆ నమ్మకం కొన్ని రోజులకు కాదు… కొన్ని తరాలనుంచే అంతే స్థిరంగా ఉంది.

ఆ చెట్టు కింద నిలిచిన అమ్మవారి రూపం చూసి, మౌనంగా నమస్కరించి వెళ్లే భక్తులు, తమ కోరికలు తల్లి తీర్చుతుందనే నమ్మకం అక్కడి వారిది. కోరినదాన్ని పొందిన ఆనందంతో మళ్లీ తిరిగి వచ్చి కృతజ్ఞతలు చెబుతారు. ఆలయం లేకపోయినా, అక్కడి భక్తి మాత్రం ఆలయాల కన్నా గొప్పదని చెప్పాల్సిందే. కాకినాడ వచ్చి, సామర్లకోట వైపు ప్రయాణిస్తే, ఈ చెట్టు వద్ద కచ్చితంగా ఆగండి. శ్రీ ముత్యాలమ్మ తల్లి దర్శనంతో ఒక్కసారి దర్శించుకోండని స్థానికులు అంటున్నారు. అమ్మవారి ఆశీస్సులతో మీ ప్రయాణం ప్రశాంతంగా సాగుతుందని చెబుతున్నారు.