అమీన్‌పూర్ భ్రమరాంబ మల్లికార్జున స్వామి ఆలయం.. ఆధ్యాత్మిక కేంద్రం. Bhramaramba Mallikarjuna Temple Center of Devotees Faith for Six Centuries

కాలక్రమంలో ఈ ఆలయం దినదినం అభివృద్ధి చెందుతూ.. ప్రస్తుతం దేవాదాయ శాఖ ఆధీనంలో నడుస్తోంది. ఈ పవిత్ర దేవస్థానం నుండి శ్రీశైలానికి సొరంగ మార్గం ఉన్నట్టు పురాణాలు చెబుతున్నాయని పూజారి తెలిపారు. ప్రతి సోమవారం భక్తులు పెద్ద సంఖ్యలో వచ్చి స్వామివారి దర్శనం చేసుకుని కోరికలు తీరతాయని నమ్ముతారు. హైదరాబాద్, పటాన్‌చెరు, లింగంపల్లి, అమీన్పూర్ వంటి పరిసర ప్రాంతాల నుండి భక్తులు కుటుంబ సమేతంగా విచ్చేసి స్వామిని దర్శించుకుంటారని తెలిపారు.

భ్రమరాంబ మల్లికార్జునుని దర్శించడం అంటే శివుని దర్శించినట్లే అన్నది భక్తుల నమ్మకం. శివుడే కర్త, కర్మ, క్రియ అన్న తత్వాన్ని ఈ ఆలయం ప్రతిబింబిస్తోందని వారు భావిస్తారు. ప్రతి సంవత్సరం మహా శివరాత్రి పర్వదినాన్ని మూడు రోజుల పాటు ఘనంగా జరుపుకుంటారు. అంతేకాకుండా, శ్రావణ మాసంలో నెల రోజుల పాటు ప్రత్యేక పూజలు, అభిషేకాలు, అన్నదాన కార్యక్రమాలు నిర్వహిస్తామని పూజారి తెలిపారు. ఆలయ పరిసరాల్లో ఏర్పాటు చేసిన గోశాలలో గోమాతను దర్శించే అవకాశాన్ని ఉందన్నారు. ఈ ఆలయం ఇప్పుడు భక్తి, శ్రద్ధ, నమ్మకానికి ప్రతీకగా మారింది.

స్వయంభువుగా వెలసిన భ్రమరాంబ మల్లికార్జున దేవస్థానంలో భక్తులకు ఆధ్యాత్మిక అనుభూతిని కలిగించేలా ప్రతిరోజూ పలు ధార్మిక కార్యక్రమాలు నిర్వహిస్తున్నారు. ఈ ఆలయంలో నిత్య సేవలు, ప్రత్యేక పూజలు, భక్తుల కోరికల మేరకు అభిషేకాలు చేస్తునట్లు తెలిపారు.

ఉదయం స్వామివారిని మేల్కొలిపే సుప్రభాత గానం ఉంటుంది. అనంతరం మల్లికార్జున స్వామికి గంగజలం, పాలు, పెరుగు, తేనె, చందనం, పంచామృతాలతో అభిషేకం చేస్తారు. విగ్రహాలకు పుష్పాలంకరణ, వస్త్రధారణనైవేద్యం, హారతి సమర్పిస్తారు. స్వామికి నైవేద్యంగా పండ్లు, ప్రసాదం సమర్పిస్తారు. అనంతరం భక్తులకు స్వామివారి దర్శనానికి అనుమతిని ఇస్తారు.