సుండిపెంటలోని అరుదైన శైవక్షేత్రం.. భక్తుల విశ్వాసానికి కేంద్రంగా నిలుస్తున్న ఆలయం..! Rare Shaiva Temple in Sundi Penta Becomes Center of Devotees Faith

ఈ ఆలయంలో ప్రధాన విగ్రహంగా బ్రహ్మలింగేశ్వరుడు కొలువై ఉన్నాడు. బ్రహ్మదేవుడు స్వయంగా ప్రతిష్టించిన ఈ లింగాన్ని “బ్రహ్మలింగేశ్వర స్వామి”గా భావిస్తారు. ఆలయం చరిత్రను పరిశీలిస్తే.. దీనికి 50 సంవత్సరాల చరిత్ర ఉంది. అయితే స్థానికులు చెబుతున్న వివరాల ప్రకారం.. ప్రకారం, ఈ దేవాలయం శతాబ్దాలుగా పవిత్ర శైవ భక్తికి, సంప్రదాయాలకు నిలయంగా నిలుస్తోందని దేవాలయ అర్చకులు జునూతల త్రిమూర్తాచార్యులు లోకల్ 18 తో తెలిపారు.

ఈ ఆలయ ప్రాంగణంలోనే మరో ప్రత్యేకతగా శ్రీ బ్రహ్మంగారి విగ్రహం ఉండడం గమనార్హం. బ్రహ్మంగారి దేవాలయం కూడా ఆలయ నిర్మాణ భాగంగానే ఉండటంతో, శైవ వైష్ణవ సంప్రదాయాల సమ్మేళనానికి ఉదాహరణగా నిలుస్తోంది. అంతేకాదు, ఈ దేవాలయంలో నవగ్రహాల విగ్రహాలు కూడా ప్రత్యేకంగా ప్రతిష్ఠించబడి ఉన్నాయి. ప్రతి భక్తుడు ఈ ఆలయాన్ని దర్శించుకుంటే, మూడు ముఖ్యమైన దేవాలయాలను ఒకేసారి దర్శించిన ఫలితాన్ని పొందుతాడనే విశ్వాసం గ్రామస్థులలో ఉంది.

ప్రతి అమావాస్య, పౌర్ణమి, శివరాత్రి సందర్భాలలో గ్రామస్తులు ప్రత్యేక పూజా కార్యక్రమాలు నిర్వహిస్తారు. భక్తులు శ్రీశైలానికి వచ్చే దారిలో తప్పక ఈ ఆలయాన్ని సందర్శిస్తూ శాంతి, భక్తి అనుభూతిని పొందుతున్నారు. ప్రభుత్వం, దేవాదాయ శాఖ ఆధ్వర్యంలో ఆలయ అభివృద్ధి, ప్రాచీనతను కాపాడేందుకు అవసరమైన చర్యలు తీసుకోవాలని స్థానికులు కోరుతున్నారు. పర్యాటక అభివృద్ధిలో భాగంగా ఇది ఒక ముఖ్యమైన ఆధ్యాత్మిక పర్యాటక స్థలంగా మారే అవకాశముందని విశ్వసిస్తున్నారు. ఈ ఆలయం చేరుకోవడానికి ముందుగా శ్రీశైలం నుంచి 10 కిలోమీటర్ల దూరంలో సుండిపెంట గ్రామంలోని స్టార్ సెంటర్ నుంచి సులేమాన్ సెంటర్ కి వెళ్లే మార్గంలో ఉంటుంది.