Mysterious Well: రహస్యాలతో నిండిన పాలబావి.. కరువు రాయలసీమలో అద్భుతం | Palabavi A Mysterious Perennial Well in Rayalaseema Defying Drought and Time

స్థానిక వృద్ధుల మాటల్లో కర్ణాటకకు చెందిన సాసవుల చిన్నమ్మ అనే విష్ణుభక్తురాలు ఖాద్రి లక్ష్మీనరసింహస్వామి భక్తిగా ఈ ప్రాంతానికి వచ్చి రాత్రికి రాత్రే ఈ బావిని తవ్వించిందట. బావి కొంత లోతు తవ్విన తర్వాత అందులోనుంచి కోడికూత, రోకలితో ధాన్యం దంచే శబ్దం వినిపించిందట. దాంతో అక్కడ మరో లోకం ఉందని భావించి తవ్వకాన్ని ఆపేశారు. అంతటి నుండి ఈ బావిలో నీళ్లు ఎప్పటికీ ఎండిపోకుండా ప్రవహిస్తున్నాయట!

ఈ బావిలోని నీరు పాలు వలె ఉండటంతో దీనికి ‘పాలబావి’ అనే పేరు వచ్చింది. వేసవికాలం అయినా సరే బావిలో నీళ్లు పొంగిపొర్లుతూనే ఉంటాయి. దీన్ని చూసినవారంతా ఆశ్చర్యానికి గురవుతారు. ఈ నీరు చల్లగా, తెల్లగా ఉండటం విశేషం. భక్తుల నమ్మకానికి పాలబావి కేంద్రబిందువుగా మారింది. ఈ బావిలోని నీటిని సేకరించి గంగమ్మ పూజలు నిర్వహిస్తే: వివాహం కాని వారికి త్వరలో పెళ్లి అవుతుందట, పిల్లలు లేకపోతే సంతానాన్ని కలుగుతుందట, దీర్ఘకాలిక రోగాలు తగ్గిపోతాయని నమ్మకం ఉంది. ఈ విశ్వాసాల ఆధారంగా రోజూ శ్రద్ధా భక్తులతో పాలబావి సందడిగా కనిపిస్తుంది.

ఖాద్రి లక్ష్మీనరసింహస్వామిని దర్శించుకునేందుకు వస్తున్న కర్ణాటక భక్తులు చాలా మంది ఈ పాలబావిని కూడా దర్శిస్తారు. ప్రత్యేకించి శివరాత్రి, కర్తికమాసం, నవరాత్రులు లాంటి పవిత్ర సందర్భాల్లో అధిక సంఖ్యలో భక్తులు ఇక్కడకు చేరతారు.పాలబావి ఒక మతపరమైన కేంద్రంగా మాత్రమే కాదు, ఒక ప్రకృతిరమణీయంగా కూడా నిలుస్తోంది. రాయలసీమ ఎండల్లోను ఎండిపోని బావి అంటే అద్భుతమే. ఇలాంటి దుర్లభమైన జలసంపదలు భవిష్యత్తు తరాలకూ అందుబాటులో ఉండాలంటే స్థానికులు, యాత్రికులు సంరక్షణపై కూడా దృష్టి పెట్టాల్సిన అవసరం ఉంది. పాలబావి – భక్తి, పురాణం, ప్రకృతి, విశ్వాసం అన్నింటికీ ప్రతిరూపంగా వెలుగొందుతోంది. రాయలసీమ ప్రజల గుండెల్లో ఎప్పటికీ చిరస్థాయిగా నిలిచే ఆధ్యాత్మిక తీరంగా మారింది.