గోదావరి నదిలో పోలీసుల మాక్ డ్రిల్… ఎందుకో తెలుసా? | Police mock drill in the Godavari River Do you know why

అటు మంచిర్యాల జిల్లా దండెపల్లి మండలం గూడెంలో కొలువున్న శ్రీ రమా సహిత సత్యనారాయణ స్వామిని దర్శించుకునేందుకు వచ్చే భక్తులు కూడా సమీపంలోని గోదావరి నదిలో స్నానాలు చేసి వచ్చి స్వామి వారిని దర్శించుకొని మొక్కు తీర్చుకొని వెళుతుంటారు. ఈ నేపథ్యంలో ప్రమాదబారిన పడి ప్రాణాలు కోల్పోయిన సంఘటనలు కూడా ఉన్నాయి. అయితే ఇటీవల నిర్మల్ జిల్లా బాసరలో గోదావరి నదిలో స్నానాలు చేసేందుకు వెళ్లి ఐదుగురు యువకులు మృతి చెందారు. దీంతో గోదావరి నదిలో భక్తుల రక్షణపై యంత్రాంగం దృష్టి సారించింది. ఇందులో పోలీసు శాఖ ఒకడుగు ముందుకు వేసి విపత్కర పరిస్థితులు నెలకొన్న సమయంలో ఎదుర్కొనేందుకు వీలుగా ముందస్తు చర్యలు చేపట్టింది.

ఇందులో భాగంగా ప్రసిద్ధ పుణ్య క్షేత్రమైన నిర్మల్ జిల్లా బాసర వద్ద గోదావరి నదిలో మాక్ డ్రిల్ నిర్వహించారు. రెండు గంటలపాటు కొనసాగిన ఈ మాక్ డ్రిల్‌లో మహిళా శివంగి పోలీసులు, డీడీఆర్ఎఫ్ పోలీసులతో కలిసి ఈ మాక్ డ్రిల్ నిర్వహించారు. జిల్లా ఎస్.పి జానకి షర్మిల, అదనపు ఎస్.పి అవినాష్ కుమార్ కూడా పాల్గొన్నారు. అత్యవసర పరిస్థితుల్లో తీసుకోవలసిన జాగ్రత్తల గురించి ఈ సందర్భంగా పోలీసులకు అవగాహన కల్పించారు. ప్రకృతి విపత్తులు సంభవించినప్పుడు, వరద నీటిలో కొట్టుకుపోతున్న సమయంలో ప్రాణాలను ఎలా కాపాడాలో సిబ్బందికి అవగాహన కల్పించారు.

రానున్న రోజుల్లో కురిసే వర్షాలను దృష్టిలో ఉంచుకొని ప్రత్యేకంగా డిస్ట్రిక్ట్ డిజాస్టర్ రెస్పాన్స్ ఫోర్స్‌ను ఏర్పాటు చేశారు. ఇందుకోసం జిల్లాలోని ఒక్కో పోలీసు స్టేషన్ నుండి ముగ్గురు చొప్పున మొత్తం 82 మందిని ఎంపిక చేసి, వారికి జిల్లా కేంద్రంలోని బంగల్ పేట్ చెరువులో ప్రత్యేకంగా శిక్షణ ఇచ్చినట్లు జిల్లా ఎస్. పి జానకి షర్మిల తెలిపారు. శిక్షణ పొందిన ఈ బృందంతో కలిసి నిర్మల్ జిల్లా బాసరలోని గోదావరి నదిలో మాక్ డ్రిల్ నిర్వహించారు. ఏది ఏమైనప్పటికీ నిత్యం బాసర అమ్మవారి దర్శనం కోసం వచ్చే భక్తులతో కిటకిటలాడే గోదావరి తీరంలో పటిష్టమైన భద్రతా చర్యలు చేపట్టి వారికి రక్షణ కల్పించాల్సిన అవసరం ఎంతైనా ఉంది.