ఏపీలో పొత్తులపై దసరా పండుగ రోజున టీడీపీ, జనసేన ఉమ్మడి కార్యాచరణ|tdp and jana sena joint activity on dussehra festival on alliances in ap

అరెస్ట్‌తో వేడెక్కిన పాలిటిక్స్..

టీడీపీ అధినేత చంద్రబాబు నాయుడు అరెస్ట్‌తో ఏపీలో ఒక్కసారిగా మారిన రాజకీయ పరిణామాల నేపధ్యంలో జనసేన-బీజేపీల మధ్య ఉన్న బంధం బలహీన పడినట్లు కనిపిస్తుంది. చంద్రబాబు నాయుడు అరెస్ట్ తరువాత తాను పొత్తులో ఉన్న బీజేపీకి కనీస సమాచారం కూడా ఇవ్వకుండానే తాను తెలుగు దేశం పార్టీ తో కలిసి పోటీ చేస్తున్నామంటూ పవన్ కల్యాణ్ ప్రకటించడంతో ఒక్కసారిగా రాష్ట్ర రాజకీయాలలో సంచలనానికి తెరలేపారు. దీనికి తోడు తెలంగాణ రాష్ట్రం లో ఎన్నికలకు నోటిఫికేషన్ విడుదలై పక్షం రోజులు గడుస్తున్నా బీజేపీ-జనసేన పొత్తు అంశంపై స్పష్టత రాకపోడం కూడా ఈ వాదనలకు బలం చేకూరుస్తుంది.

ఉమ్మడి ప్రణాళిక..

మరో వైపు ఏపీలో శనివారం జరిగిన రాజకీయ పరిణామాలు రాష్త్ర రాజకీయాలలో పెనుమార్పులకు శ్రీకారం చుట్టబోతున్నాయంటున్నారు రాజకీయ విశ్లేషకులు. టీడీపీ-జనసేన పార్టీలు తమ తమ పార్టీల కార్యవర్గ సమావేశాలు నిర్వహించి పార్టీ క్యాడర్ కు కీలక మైన సూచనలు చేసినట్లు సమాచారం.

దసరా రోజునే ముహుర్తం..

దసరా సందర్భంగా రెండు పార్టీలు కలిసి ఉమ్మడి కార్యాచరణను ప్రకటించే అవకాశం ఉందంటున్నారు రాజకీయ విశ్లేషకులు. ఈ కార్యాచరణ లో భాగంగా చంద్రబాబు నాయుడు అక్రమ అరెస్ట్ కు వ్యతిరేకంగా వైసీపీ ప్రభుత్వంపై రెండుపార్టీలు కలిసి ఎలా ముందుకు వెళ్లాలి అనే అంశం పై ఓ స్పష్టత వచ్చే అవకాశం ఉందంటున్నారు రాజకీయ విశ్లేషకులు. మరో వైపు చంద్రబాబు సతీమణి భువనేశ్వరి ఈ నెల 25 నుండి “నిజం గెలవాలి ” పేరుతో రాష్ట్ర వ్యాప్తంగా బస్సు యాత్ర చేపట్టనున్నట్లు ప్రకటించారు.